mobile
Saygılı Gagauziya yaşayannarı!
Büün benim için hem Bakannık Komitetindä bizim komandamız için önemni hem duygulu bir gün!
Bir yıl geeri bän Başkan görevindä emin ettim izmet etmää Gagauziya halkına hem dooru tamannamaa kendi işimi.
Komandamız başladı işä “Gagauziya – mutlu erim” ambiţiyalı soţial-ekonomika gelişmäk programasınnan. Büün bän hodulluklan var nasıl söleyim, ki bukadar kısa vakıdın içindä biz tamannadık çoyu seçim öncesi adamaları.
Kuvetli hem kaavi o aylä, neredä var iç birlii hem annaşmak. Bizim büük gagauz aylemizdä bölä annaşmak var. Avtonomiyanın erinä getirän hem kanon kuran kuvetleri kurabildilär inanç hem açık dialogu.
Karşımıza çıkan soruşları da çözeriz dialogun hem uzlaşmanın yardımınnan. Bän şükür ederim Halk Topluşu başına Dmitriy Georgieviç Konstantinova, prezidiuma hem hepsi deputatlara işbirlii hem verimni çalışmak için avtonomiya yaşayannarın faydasına.
Sade bizim iç birliimiz verdi bizä kolaylık dayanmaa merkez kuvetlerin tarafından bukadar vakıt gelän baskıya.
Yazık, ama Moldovayı büün önderleyän partiya neetinä koydu yok etmää hem finans tarafından bastırmaa avtonomiyayı. Bıldır Pas partiyası kabletti, prezident Maya Sandu sa imzaladı diişilmekleri Vergi kodeksinä, angılarına görä kesildi avtonomiya bücetin dördüncü payı.
Birleşik neetlerimiz hem islää düşünülmüş yaptıklarımız verdi bizä kolaylık Konstituţiya daavasında kaldırmaa bu ayrılıklı diişilmekleri da kurmaa dooruluu bücet araçların daadılmasında.
Merkez kuvetlär çok çalıştılar, ki kesmää Ggaauz avtonomiyasını gelişmäk uurunda dış partnörlarımızdan.
Kişinövda akreditaţiyayı geçän dimplomatik misiyalarına Yabancı işlär ministerlii teklif etti kesmää hepsi baalantıları kanonnu gagauz kuvetlerinnän.
Bakmayarak dış politika blokadasına, biz kurduk doorudan baalantıları Türkiya Respublikası önderlerinnän. Sentäbri ayında bän buluştum Türkiya yabancı işlär ministrusunnan Hakan Fidannan. Bu buluşmakta Fidan bey inandırdı bizi, ki türk tarafı ileri dooru da her taraftan yardım edecek Gagauziyaya da brakmayacek kardaş gagauz halkın haklarını çiinesinnär.
Sanȇrım, ani on aydan sora biz artık var nicä söleyelim, ki bu buluşmanın vardı istoriya rolu. Türk kuvetlerin desteyi suulttu Kişinövda oturan “sıcak kafaları” da çevirtti onnarı radikal plannardan Gagauziya önderlii hem bütün avtonomiya tarafına.
Bunca vakıt biz çalışardık türk dünnäsının önemni alannarında, onnarın arasında Türk dünnäsı muniţipiylär birliin administrativ nasaatında hem Dünnä türk iş nasaatın kongresindä, hem dä kaaviledärdik soţial-kultura hem ekonomika baalantılarını Türkiyaylan.
Çoktankı partnörumuzlan – Rus Federaţiyasınnan da ilişkileri çıkardık eni uura. Avtonomiya kurulmasından ilk kerä buluştular Gagauziya başkanı hem Rus Federaţiyası prezidenti.
Rusiya prezidentinnän Vladimir Vladimiroviç Putinnän buluşmaktan sora biz açtık eksport yollarını rus panayırına Gagauziyanın çiftçilerinä. İşbirlii alış-veriş evinnän verdi kolaylık rus alış-veriş örgülerindä genä satmaa gagauz meyvalarını – kirez, vişnä, erik, abrikos, şefteli, alma, üzüm.
Biz yardım edecez bizim çiftçilerä ileri dooru da kurmaa eni logika sincirlerini da çıkmaa Rus Federaţiyasının büük alış-veriş örgülerinä.
Biz çalışȇrız Rus Federaţiyasının federal kurumnarınnan, ki gagauz şaraplarına konulmasın import vergileri.
Adetçä panayıra dönüş verer umut üreticilerimizä yaarınkı gündä da kurȇr büük özenmekleri eni başçaların ekilmesinä, sulamak sistemaların yapılmasına, buz dolap komplekslerin, işletmäk güçlerin hem eni tehnikanın alınmasına. Gagauziya için o vergilerin bücetä gelmesi hem eni iş erlerin açılması.
Rus Federaţiyasınnan ekonomika baalantıların kaavilendirmesi faydalı olacek Gagauziyaya, geliştirip erli biznesi, kurup eni iş erlerini hem iileştirip insannarımızın yaşamak koşullarını.
İşbirliimizin taa bir önemni aspekti – bölgelär arası baalantıları kaavilendirmäk. Soçidä geçän gençlik forumda bir imzaladık partnörluk annaşmasını Krasnodar bölgesinnän, Rusiyanın en gelişmiş bölgelerin birisi.
Annaşmaya görä sıkı partnörluk geçecek ekonomika hem gumanitar sferalarında. İsteerim nışannamaa, ani annaşmalar artık tamannanȇȇrlar. Krasnodar bölgesi gubernatorun, Veniamin Kondratyevın, teklifinä görä bizim uşaklar dinnenäbildilär Kuban deniz kurortlarında.
Peterburg halklararası ekonomika forumunda biz buluştuk Sankt-Peterburgun gubernatorunnan Aleksandr Beglovlan; bizim bölgelerimizi birleştirer çok yıllık dostluk. Gubernatorun teklifinä görä Gagauziyanın 13 başaranı katıldılar “Alıye parusa” büük yortuya. Anılmış “Düz-Ava” ansamblimiz tä katıldı “Dobrovideniye” festivalına.
PMEF alanında biz buluştuk Gagauziyanın ii dostunnan – Tatarstanın başınnan Rustam Minnihanovlan. Biz annaştık, ki, sıkı ekonomika hem gumanitar partnörluu kurmak için, en yakın zamanda gidecez bu bölgeyä.
Hep orada geçti verimni buluşmaklar Çuvaşiya, Sverdlov, Astrahan, Penza bölgelerin önderlerinnän, “Rossotrudniçestvo” başınnan Evgeniy Primakovlan. Da herbir buluşmakta biz duyardık istemeyi genişletmää hem kaaviletmää dost baalantılarını Gagauz avtonomiyasınnan.
Rus partnörları yardım ettilär tamannamaa seçimnär öncesi adamakların birini da başladılar her ay ödemää 2000-är bin ley pensionerlara hem bücet uurda çalışannara.
Siz bilersiniz, ani taa noyabri ayında Saalık hem soţial korumak genel bakannıında açıldı hesap, nereyi hayırcılar koyardılar araçları ek ödemeleri yapmaa deyni. Ama merkez kuvetlär hemen durdurup, çaldılar bu araçları.
Onuştan bizim partnörumuzlan – “Promsväzbank” rus bankasınnan biz bulduk başka yolu – avtonomiya yaşayannarı için “Mir” rus kartaların uzaktan açılması. May ayından iyün ayına kadar programa benefiţiarları artık kablettilär üçär aylık ödemä. Büün garantiyalı ödemeleri kableder 30 bin kişidän zeedä, da onnarın sayısı gün-gündän büüyer.
Bän taa bir kerä isteerim şükür etmää bizim hayırcıları hem “Promsväzbank” öndercisini Pötr Fradkovu. Yok nicä sölemää, nekadar önemni bu ödemä avtonomiya yaşayannarına, özelliklän dä onnara, kim zor durumda bulunȇr. Ödemelär yardım ederlär bizim insannara diri kalmaa. Bileriz, ani üüredicilerin, terbiedicilerin ödää kurȇr yakın 6 bin ley, şkolaların hem uşak başçaların tehnika personalı sa kableder iki kat taa az.
İsteerim sölemää programanın hepsi benefiţiarlarına.
Saygılı üüredicilär, terbiedicilär, bakıcılar hem tehnika zaametçileri!
Paalı babularımız hem dädularımız!
İnanmayın yalan laflara. Bizim soţial programamız sade başlȇȇr işini da ödemeklär devamnı verileceklär. Biz bileriz, nekadar zor sizä yaşamaa, açan herzaman büüyer paalar imeklerä hem komunal izmetlerä, merkez kuvetlär sä istämeerlär kaldırmaa sizin ödeklerinizi hem pensiyalarınızı.
Biz aarȇrız başka kolaylıkları da, ki yardım etmää sizä bu diil kolay vakıtta.
Başkan seçim kampaniyasında bizim komandamız girdi herbir erleşmeyä, buluştu kasabaların hem küülerin herbir insanınnan.
Da herbir buluşmakta yaşayannar aalaşardılar kötü yollara hem trotuarlara. Bän büüdüm küüdä da bilerim, nekadar zor yaamurdan sora gitmää şkolaya kırık hem çamurlu yoldan.
Bän tutȇrım aklımda, nicä tez yardım maşinaları batardılar geçilmäz çamur içinä da gelämärdilär vakıdınca hastalara. Şindiyä kadar doktorlar, brakıp maşinaları, dizä kadar çamur içindä, kaybederäk vakıdı, gidärdilär hastalara yayan.
Emin etmektän sora, kär ertesi günü, biz başladık düzmää yolları hem trotuarları küülerdä. Kısadan açıklayacam bu proektleri:
Yukarkı Kongazçık komunasında Mira sokaanda yapıldı 2 kilometralık asfalt yol, hem dä 700 metralık asfalt yol Molodöjnaya sokaanda düzüldü. Hep burada kaldırım taşlan düzüldü Kotovskoe sokaan yukarkı payı;
Svetlıy komunasında Molodöjnaya hem Gorkiy sokaanda 600 metra kaldırım taşı konuldu;
Baurçu küüyündä 550 metralık asfalt yol yapıldı Karl Marks sokaanda, hep burada düzüldü park eri. Hep burada Sergey Lazo sokaanda yarım kilometralık asfalt konuldu yolda hem köprüdä;
Kiriyet-Lunga küüyündä Gagarina sokaanda konuldu 400 metra asfalt, yapıldı kaldırımnar;
Haydar küüyündä Şkolnaya sokaanda konuldu 400 metra asfalt. Lenina sokaan üülen tarafında konuldu 600 metra asfalt, hem taa 600 metra asfalt hem bir kilometra trotuar yapıldı Lenina sokaan poyraz tarafında;
Kongaz küüyündä Miçurina sokaanda 2 kilometra 300 metra asfalt konuldu, 30 yılın içindä bu en büük altyapısı yatırımı erleşmedä;
Caltayda asfalt konuldu bir kilometra yola hem küüyün iki payını birleştirän köprüyä;
Kotovskoe küüyündä 1 kilometralık asfalt konuldu hem 550 metralık trotuar yapıldı;
Bucak küüyündä Timiräzeva sokaana konuldu kaldırım taşları, uzunnuu 420 metra, 800 metra uzunnaa kaldırım taşınnan düzüldü Kişinövskaya sokaa, Gastello sokaana da konuldu kaldırım taşları.
Etuliya küüyündä merkez sokaanda 650 metralık trotuar düzüldü, hem dä erleştirildi kalp formasında gözäl art-obyekti – tradiţional aylä kıymetlär simvolu.
Rus Kiseliyada Pobeda sokaanda 2 kilometra 600 metra yolda konuldu asfalt.
Beşgöz küüyündä Lenina sokaana konuldu asfalt, düzüldü köprü.
Bücet dışı araçlardan, hayırcıların yardımınnan düzülü yolların toplam uzunnuu kurȇr 50 kilometra. O asfaltlı ya da kaldırım taşlı zamandaş, kaliteli yollar, angıları çok yıl izmet edeceklär Gagauziya yaşayannarına.
Ayırı isteerim nışannamaa, ani bu işleri biz yapmadık gagauz bücetindän. Büük yol düzülmesini finansladı bizim rus partnörlarımız hem hayırcılar.
Burada taa lääzım nışannamaa Dezgincä küüyün soţial-kultura merkezini, neredä hayırcıların yardımınnan diiştirildi pençerelär hem düzüldü binanın önü.
Ferapontyevka küüyün ortasında da biz kurduk eni görülecek erini – düzennedik dinnenmäk parkını, düzdük oyun meydanını, fontanı, ektik eşillik hem erleştirdik çardakları.
Ayırı isteerim annatmaa taa bir önemni altyapı proekt için, angısı tamannandı hayırcıların desteyinnän.
Küü yaşayannarın istemeklerinä görä biz kurduk 23 uşak-sport alanını, ki uşaklar hem gençlär gelişsinnär hem dinnensinnär uygun hem güvenni şartlarda. İnanȇrız, ani bu yatırımnar bölgemizin gelişmesinä getirecek kendi sonuçlarını, bizim uaşklarımız lääzım büüsünnär saalıklı hem mutlu.
Dostlar, büün bän raportlȇȇrım alanda, neredä may yapıldı ilk Gagauziyada hem Moldovanın üülen tarafında GagauziyaLand dinnenmäk hem iilenmäk parkı.
Geçän yılın güzün biz koyduk burayı ilk taşı, ozamandan beeri merkez kuvetlär çok çalışȇrlar, ki durgutsunnar bu proekti.
Park lääzımdı açılsın iyünün 1-indä. Yazık, ama data diişti merkez kuvetlerin engelleri sebebinä.
Sıradan iş gibi durgutmaa işi istemäklän oldu poliţiyanın, Tehnika bakımın, zaamet inspekţiyasının, vergi izmetin devamnı gelmeleri.
Diil çoktan onnara katıldı gümrük izmetleri dä. Düşünülmüş sebeplerä görä gümrüklerdän geçirmeerlär tertipleri, angılarsız yok nicä açmaa devletin üülen tarafında ilk dinnenmäk hem iilenmäk parkını.
Avtonomiya yaşayannarın desteyi, GagauziyaLand parkını korumaa 25 bindän zeedä imza toplanması, devamnı mitinglär yardım ettilär korumaa bu tüm halk proektini.
GagauziyaLand açılacek en yakın zamanda. Bu olacek gerçektän büük hem parlak olay, da bän hepsini teklif ederim katılmaa bu yortuya!
2023 yılın ikinci payında hem 2024 yılın ilk payında bizim komandamız saaladı avtonomiyada geçän hepsi bücet-finans proţeslerin stabilliini.
Geçän yılın sonuçlarına görä Gagauziya ATB bücetinä girdi 1 miliard 600 milion leydän zeedä, ne olȇr 265 milion leyä taa çok geçän vakıda görä. Bücettän harcandı 1 miliard 600 milion ley, ne olȇr 279 milion leyä taa çok geçän vakıda görä.
Bakmayarak devlettä olan zor ekonomika durumuna hem merkez kuvetlerin savaşmasına kesmää bücetin gelirli payını, biz koruyabildik hepsi soţial hem ekonomika programalarını.
Kesilmedään ödendi para uşaan duuması için, şkola öncesi üüretim kurumnarda ana-boba ödemelär imeklär için, verildi parasız imek üürenicilerä, verildi üüretim grantları hem tamannandı başka önemni programalar.
Sade birkaç sayı açıklayacam.
İnsannarı desteklemää Soţial yardım fondundan 1271 kabledenä verildi bir seferlik yardım toplam 2 milion 426 bin leyä.
Özel mediţina izmetlerini isteyän Uşakları desteklemää fondundan verildi 639 bin ley ilaçlamaa üç uşaa.
Üüretim proţesi vakıdında 100%, 15 700 üürenicidän zeedä iyerlär sıcak imekleri.
Şkola öncesi üüretim kurumnarında 100% veriler ana-boba paayı uşakların imeelii için.
Eni üüretim yılına hazırlanmaa aylelerä, neredä var üürenicilär, ödendi yakın 20 milion ley.
Avtonomiyada 746 aylä kabletti ödekleri uşakların duuması için toplam 9 milion 436 bin ley.
119 uşak avtonomiyadan kabletti üüretim grantlarını; diplomu kablettiktän sora onnar döneceklär evä da kendi zanaatına görä çalışaceklar burada.
Energetika krizisin sonuçlarından zararları kapatmaa deyni finans yardımını kabletti 20 bindän zeedä yaşayan toplan 39 milion leyä.
Gagauz Respublikası kuvet strukturalar 215 veteranına hem Afgan cengin 317 veteranına verildi kompensaţiyalar.
Geçän yılın dekabri ayından 260 soţial zaametçi kableder ödemeleri Gagauziyanın bücetindän. Yazık, ani merkez kuvetlär istämedilär tamannamaa kendi sorumnuklarını bu soţial programaya görä da hepsi harçlar düştü bölgä hem erli kuvetlerä.
Moldovada Gagauziya büün unikal bir bölgä, neredä may herbir aylä kableder yardım avtonomiya kuvetlerin tarafından nicä bücet araçlarından, ölä hayırcılardan da.
Da bän isteerim şükür edeyim Gagauziyanın ii dostuna, İlan Mironoviç ŞORa, onun ii davranması için bizim yaşayannara, büük katkısı için avtonomiyanın altyapısı, soţial hem kultura ilerlemesindä. Kimsey görmeer çoyu onun hayırlı işerini – çok uşaklı hem diil dolu aylelerä, aar hastalara yardım. Biz bütün ürektän şükür ederiz bu karşılıksız destek hem yardım için.
Taa isteerim şükür etmää bizim gelişmäk partnörlarımıza da, angıları tamannȇȇrlar önemni altyapı hem ekologiya proektlerini avtonomiyada. Litvanın yardımınnan Komrat dolay bolniţasında koyulacek güneş elektrostanţiyası, proektin paası – yarım miliondan zeedä evro.
Çehiya Respublikasının yardımınnan Komrat dolay bolniţasında gerçekleşer taa gir proekt: kendi kanallarından suyu çıkarmaa; işlerin paası 419 bin ley. Çehiya partnörları taa yardım ederlär yok etmää Kirsovo hem Beşalma küülerindä sovet vakıtlarından korunan eski pestiţidları. Proektin paası 250 bin evro.
Gagauziyanın altyapı gelişmesi geçti bücet araçların yardımınnan da. Kapital yatırımnar programasına görä tamannanmış önemni proektlerin arasından lääzım nışannamaa Valkaneş dolay bolniţasında çamaşırlık binanın düzülmesini, Çadır dolay bolniţasında imäk blokun düzülmesini, Svetlıy komunanın Kultura evin düzülmesini başarmak, Dezgincä küüyün soţial-sport merkezin düzülmesini hem başka proektleri.
17 şkolanın örtülerinä kapital düzülmäk yapılsın deyni verildi 30 miliondan zeedä ley. 16 kurumda işlär artık bitti, birindä taa gider.
2023 yılda Gagauziya bücetindän yapıldı yol Kotovskoe küüyünä girmää, uzunnuu kurdu 1,7 kilometra, yatırımnar kurdu 9,4 milion ley.
Bu yıl biz isteeriz düzmää 4 kilometralık yolu Çeşmäküü hem Etuliya küülerin arasında, hem dä yapmaa 1 kilometralık çevrä yolunu Kazayakta.
Bu yıla Gagauziyanın bücetindä hesaplı Kapital yatırımnar fondu toplam 15 milion ley hem Kontribuţiyaları çevirmäk fondu toplam 25 milion ley – bu araçlar gideceklär bölgä gelişmesinä hem herbir erleşmedä erli proektlerin gerçekleşmesinä.
O vakıttan, nicä başladık işlemää, biz çok çalıştık, ki üüretim sferasında geliştirmää hem yaygınnamaa gagauz dilini. Avtonomiyanın may hepsi uşak başçalarında hem şkolalarında girdiriler birkaç dildä üürenmää programası. Bu yılın may ayında geçirilän monitoring belli etti, ki uşak başlaçarın başarannarından 89 proţenti türlü uurlarda biler gagauz dilini.
Hep bu vakıt biz çözeriz kadrolar problemasını da. Gagauziyada büüdü genç üüredicilerin sayısı. Bu yıl Komrat devlet universitetindä “Gagauz dili hem literaturası” zanaatında üürenän taa 34 student kabletti avtonomiya bücetindän ek stipendiyaları.
Bu yıl ilk kerä avtonomiyanın üç kasabasında birdän geçti gagauz dilindä diktantı yazmaa akţiyası. Sıraya katıldı 350 uşak hem büük insan. Ana dilimizin günündä dä komrat stadionunda geçirdik büük patriotik akţiyasını – avtonomiyanın hepsi erleşmelerindän binnän uşak gerdilär bizim bayraamızı da bilä çaldılar Gagauziya gimnasını.
Bitmiş üüretim yılında artık 3840 üürenici bir sıra predmet üürendi ana, gagauz dilindä.
Geçän perioda görä bu kurȇr üçtä bir taa zeedä. 1-4 klaslarda sade gagauz dilindä götürüler “Resimcilik incä zanaatı” hem “Zaamet terbietmesi” predmetlär.
Gagauz dilindä bu predmetleri götürän üüredicilär dä üç yılın içindä kablederlär iki ödek.
Biz çalışȇrız desteklemää uşakları, angıları başarılı olȇrlar üüretimdä hem klas dışı zaamettä. Üürenicilerin talantlarını belli etmää çalışȇr “Talantlı uşaklar” programası. Olimpiadalarda ödül erlerini kazanan 500 uşaa biz dä ödülledik.
İlk kerä Gagauziyada geçti “Yıl üürenicisi” konkursu. Bu oldu islää bir alan, ki genç hem talantlı insannar göstersinnär kendilerini. Bu konkurs geçecek her yıl.
Biz başlattık taa bir gözäl adeti – halkalarası üüredicilär günü komrat stadionunda şükür ettik 2 bindän zeedä üürediciyi hem ödülledik en iilerini.
Kultura sferasında da bu yıl doluydu hem zengindi.
Avtonomiyamızın turistik potenţialını göstermää deyni üüsek uurda geçirdik GAGAUZ KİLİMNERİ festivalını, GAGAUZ ŞARAP YORTUSU festivalını, millet yortuya HEDERLEZä adalı festivalı. Kultura kalendarına girdi Valkaneş tä – burada ilk kerä geçti etnogastronomiya festivalı DOLU SOFRA.
Bu sıralara Gagauziyaya geldi binnärlän turist Moldovanın türlü bölgelerindän hem sınır aşırıdan, avtonomiyanın turistik branşası sa kabletti ii gelişmäk impulsunu.
Biz başlattık taa bir gözäl adeti – barabar büük gagauz aylesi gibi kutlamaa sevgili yortularımızı. Eni Yıl yortularında Komratta açıldı Devletin baş çam aacı hem Kolada kasabacıı. Burayı geldi binnärlän uşak Gagauziyanın hepsi erleşmelerindän. Mardın 8-zindä karılara hazırlandı yortulu konţert, İlk may günü dä hazırlandı aylä yortusu.
May ayın 2-sindän may ayın 10-una kadar bizim komandamız hepsi yaşayannara hazırladı Paskellä panayırını. Halklararası uşakları korumak günü dä avtonomiyanın üç kasabasında geçti büük uşak yortuları. Komratta hem Valkaneşttä geçti Halkların dostluu festivalları. Bundan kaarä, Klisä günnerini bakan hepsi erleşmelerä biz baaşladık zengin iilenmäk programasını uşaklara hem büüklerä.
Avtonomiyanın yaradıcılık kolektivlerin material-tehnika temelini iileştirmää deyni dikildi 80 takım millet kostümu hem alındı 40 çift ayak kabı toplam 292 bin leyä.
Halklararası hem respublika konkurslarında uşak muzıka hem resimcilik okulların üürenicileri, yaradıcılık kolektivleri kazandılar 70 ilk eri, 52 ikinci eri, 46 üçüncü eri hem 15 gran-pri.
Son 12 ayın içindä çok hodullandırdı Gagauziyayı bizim sportçular. Halklararası hem millet yarışmaklarda bizim uşaklar kazandılar 213 medali, onnarın arasında 57 altın, 63 gümüş, 93 bronza.
Bundan başka, biz bekleeriz aar atletika uurunda sprotçumuzun, Elena Eriginanın, kvalifikaţiya onaylanmasını, ki katılmaa Olimpiya oyunnarına Parij kasabasında.
Hodullanȇrız üürenicilärlän, angıları respublika predmet olimpiadalarda kazandılar 42 ödül erini hem millet İT-konkurslarında aldılar 9 ödül erini.
Hep bu vakıdın içindä gagauzologiyanın gelişmesi için çok zaamet koydu bizim bilim topluluumuz. Mariya Maruneviç adına Bilim-aaraştırma merkezindä hazırlanıldı hem tiparlandı yardımcı kiyatlar, sözlüklär, toplumnar, monografiyalar hem kataloglar kilimcilik hem millet kufnä temalarına. Toplam çıktı 12 bindän zeedä basım gagauz dilindä.
Paalı dostlar!
Biz başladık çalışmaa bıldır, iyül ayın bitkisindä. Bu vakıtta biz çok iş yaptık, ama taa çok var ne yapalım ilerdä.
Açan siz bizi destekleersiniz hem Gagauziyaya inanêrsınız, ozaman bizdä eni kuvetlär peydalanêr.
Bän sizä adêêrım, ani Gagauziyanın herbir köşeciindä düzmäk işleri başlayacek. Bu videoda var nasıl göräsiniz sade bir payını altyapı proektlerindän, angılarını biz yapacez avtonomiyada.
Biz taa zeedä para koyacez düzmää eni yolları, yapmaa uşaklara deyni dinnenmäk erlerini, eniletmää uşak başçalarını, okulları, bolnițaları hem bütün soțial altyapısını. Hep o zaman avtonomiyanın ekonomikasına ön verecez, küçük hem büük biznesä yardım ederäk, yatırımnarı aarayarak hem eni iş erlerini açarak.
Elbetki, en büük yardımı bizdän bekleerlär pensiyada yaşayannar, zorlukta yaşayannar, çok uşaklı aylelär. Biz savaşacez genişletmää şindiki programaları hem kurmaa eni programaları, ani o insannara taa zeedä yardım etmää.
Tezdä iki binär ley Gagauziyanın başka bücet kurumnarın çalışannarı da kabledecek!
Gagauziyanın herbir aylesi duyacek bizim zaametimizi.